Vəkil Cavanşir Süleymanov APA-ya açıqlamasında İlham Mirzəyevin Daxili İşlər Nazirliyinin (DİN) Baş Mütəşəkkil Cinayətkarlıqla Mübarizə İdarəsində olduğunu bildirib: «Məndə olan məlumata görə, hazırda idarədədir».
İ. Mirzəyevin vəkili Xanlar Ələkbərzadə isə teleaparıcının saxlanılması barədə məlumatı olmadığını deyib.
APA-nın əldə etdiyi məlumata görə, İ. Mirzəyev rəhbərlik etdiyi klinikanın fəaliyyətində yol verilən qanunsuzluqlarla əlaqədar saxlanılıb.
***
14.15
Teleaparıcı İlham Mirzəyev dünən axşam saxlanılıb. ANS PRESS-in məlumatına görə, aparıcı ilə eyni binada yaşayan sakinlər hadisənin dünən axşam saatlarında, onların gözü qarşısında baş verdiyini bildirirlər. Polislər hamının gözünün önündə İlham Mirzəyevi maşına oturdub aparıblar. Onu aparanların Mütəşəkkil Cinayətkarlıqla Mübarizə İdarəsinin əməkdaşları olduğu bildirilir.
Teleaparıcının yaxınları ilə əlaqə saxlamaq mümkün olmayıb. Lakin adının açıqlanmasını istəməyən mənbə, İlham Mirzəyevin bir qadının şikayəti əsasında tutulduğunu bildirib.
***
14.04
Tanınmış teleaparıcı İlham Mirzəyevin həbs edilməsi ilə bağlı mediada yayılan xəbər təsdiqləndi. Teleaparıcının yaxın qohumları bu məlumatı Publika.az-a təsdiqləyiblər. Onların dediyinə görə, bu gün İ.Mirzəyev Mütəşəkkil Cinayətkarlıqla Mübarizə İdarəsinin əməkdaşları tərəfindən həbs edilib. Hazırda onun sözügedən idarədə olduğu bildirilir.
***
13.50
Tanınmış teleaparıcı İlham Mirzəyevin saxlanıldığı barədə Azadliq.info-ya məlumat daxil olub. Aparıcı ilə eyni binada yaşayan sakinlərdən daxil olan məlumata görə, bir neçə dəqiqə əvvəl polislər onu saxlayaraq aparıblar. Onu saxlayanların DİN Mütəşəkkil Cinayətkarlıqla Mübarizə İdarəsinin əməkdaşları olduğu deyilir.
Polisin İ.Mirzəyevi niyə narahat edə biləcəyi haqda hər hansı məlumat öyrənmək mümkün olmayıb.
DİN mətbuat xidmətindən teleaparıcının saxlanmasından məlumatsız olduqlarını deyiblər.
çap et