Elektron ticarətin vergiyə cəlb edilməsi iki dövlət qurumu arasında fikir ayrılığına səbəb olub. Bu məsələdə Rabitə və Yüksək Texnologiyalar Nazirliyi ilə Vergilər Nazirliyinin maraqları toqquşub.

ANS TV-nin məlumatına görə, Rabitə və Yüksək Texnologiyalar Nazirliyi ölkədə elektron ticarətin vergi və gömrük rüsumlarından azad edilməsini istəyir. Bu fikri nazir Əli Abbasov səsləndirib. Bu sahədə çalışan şirkətlərin nümayəndələri ilə görüşən nazir onların da əsas istəyinin məhz bu olduğunu qeyd edib. Amma məsələ digər dövlət qurumlarından asılıdır.

«Biz çalışacağıq müəyyən dövlət qurumlarını inandıraq ki, inkişaf üçün virtual ticarətə gömrük - vergi rüsumlarından azadetmə vacibdir. Bir çox ölkələrdə bu belədir», - deyə Rabitə və Yüksək Texnologiyalar naziri Əli Abbasov qeyd edib.

Amma Vergilər Nazirliyi fərqli düşünür. Qurumda hesab edirlər ki, əksinə elektron ticarətin dövriyyəsi getdikcə genişləndiyinə görə, vergi nəzarəti daha da ciddiləşməlidir.

Mövcud qanunvericiliyə görə, elektron ticarətlə məşğul olan şirkətlər ya nəzarət-kassa aparatları vasitəsilə vergiyə cəlb olunur. Ya öz gəlirləri və mənfəətləri barədə Vergilər Nazirliyinə hesabat təqdim etməklə vergi ödəməlidirlər.